Dr Herold Truter, het sy kinderjare op Wolseley deurgebring, gematrikuleer aan Paarl Gimnasium en in 1992 as ‘n tandarts gekwalifiseer aan die Universiteit van Stellenbosch.

In 1994 koop hy die praktyk op Piketberg – na 3 kinders en amper 30jaar saam met sy gesin hier op Piketberg, is Piketberg se mense en die omliggende gemeenskap deel van wie hy is. As hy nie sy passie vir tandheelkunde uitleef nie, speel hy gholf of ry fiets.

Dr. Jasper Müller matrikuleer in 2014 aan Hoërskool Augsburg te Clanwilliam. In 2019 verwerf hy sy BDS- graad aan die Universiteit van die Wes-Kaap, waarna hy sy gemeenskapjaar in Springbok voltooi.

Dr. Müller verhuis na Kathu waar hy sy loopbaan as ‘n privaattandarts afskop. Sy hart het nog altyd terug gehunker na sy wortels en daarom sluit hy in 2022 by Bergrivier Dental aan. Dr. Müller het ‘n passie vir sy beroep en liefde vir mense.

Dr. Saskia Smalberger sluit vroeg in 2018 aan by die praktyk. Alhoewel sy daarvan hou om alle pasiënte te help met hulle tandheelkundige behoeftes, is haar passie om met kinders te werk.

Dit is vir haar belangrik dat hulle ‘n liefde vir mondhigiëne ontwikkel sodat hulle, vir die res van hulle lewens, vreesloos by ‘n tandarts kan instap en met ‘n glimlag kan uitstap.

Bendert, ‘n gebore Piketberger, het hom in 2021 by Bergrivier Dental aangesluit.

Hy is ‘n gekwalifiseerde tandterapeut wat spesialiseer in tandekstraksies, klein herstellings, tandpolering en X-strale, waartydens hy pasiente met die nodige mondhigiene – instruksies en kennis bystaan. Bendert is ook ‘n kranige tennisspeler en afrigter.

Lizette het in Velddrif gematrikuleer, na skool werk sy vir 3jaar as stoelassistent in Somerset Wes en sit daarna haar loopbaan vir 10jaar voort in Saldanha.

In 2017 sluit sy by Bergrivier Dental aan, as senior stoelassistent vir Dr Herold Truter. Met haar lojale en praktiese geaardheid is sy ‘n aanwins vir enige praktyk. Lizette geniet dit om ver ente langs die see stap en om’n vleisie op die kole te braai.

Elaine het nog altyd ‘n passie vir mense gehad. Sy was voorheen betrokke by maatskaplike dienste en het in 2006 by Bergrivier Dental begin as junior stoelassistent.

Na verdere studie het sy gekwalifiseer as senior stoelassistent en is tans Dr Jasper Muller se regterhand. Elaine is bekend vir haar vrolike en hulpvaardige geaardheid – haar staaltjies helder almal se dag op. Die groot liefde in haar lewe is haar kleinkind en sy geniet dit om te toer.

Elsabé het grootgeword op Porterville, Aptekerswese gestudeer aan die Universiteit van Stellenbosch en daar vir Herold Truter ontmoet. In 1994 verhuis hulle Piketberg toe en sy word aangestel as Bergrivier Dental se praktykbestuurder.

Na amper 30jaar, geniet sy dit steeds om deel van die praktyk en die personeel te wees. Sy is baie lief vir lees, oefen, TV – kyk, maar bo alles, om tyd te spandeer saam met familie en vriende.

Jeslyne het in 2022 eers by die Bergrivier Dental – span aangesluit, maar sy is al jare lank ‘n inwoner van Piketberg.

Sy het vir meer as 5 jaar by Piketberg Kliniek gewerk en aangesien die pasiente se geluk en gemak nog altyd haar eerste prioriteit was, het sy maklik die skuif na tandheelkunde gemaak. As sy nie werk nie, verkies sy om tyd saam met haar familie te spandeer.

Sonja kom oorspronklik van die Overberg(Swellendam). Voor sy in September 2021 by Bergrivier Dental begin werk het, het sy vir 20jaar in die Karoo gebly.

Daar het sy gewerk as linnematrone in Merweville en ook as ontvangsdame en gastehuisbestuurder. In 2021 het hierdie vriendelike, behulpsame dame, die Karoovlaktes verruil vir die Swartland se berge. Haar groot liefdes is diere, die natuur, goeie kos, dans en tyd saam met haar vriende en geliefdes.

Corné het na haar studies, haar loopbaan by Tulbagh Wynkelder begin. Daarna het sy die finansiele bestuur behartig, by verskeie wynkelders en plase in die Paarl omgewing.

In 2016 het sy aangesluit by die Bergrivier Dental – span. Sy hanteer alle eise, mediesefondse, betalings en navrae. Aangesien Corne ‘n uitstekende organiseerder is, hou van mense en probleme oplos – pas hierdie pos haar soos ‘n handskoen. Corné se belangstellings is lees, om tyd met haar gesin te spandeer en koffie te drink.

Monica is sedert Februarie 2016 ontvangsdame by ons takpraktyk te Citrusdal. Niks is te veel moeite vir hierdie vriendelike en hulpvaardige dame nie. Die tandartse wat sy gereeld bederf met ietsie te ete, kan getuig daarvan. As sy nie omsien na ander nie, geniet sy die natuur, lees en om naaldwerk te doen.